Letras Galegas

Para conmemorar as Letras Galegas o noso amiguiño Mik presentounos a Begoña Caamaño e falounos da súa faceta como periodista radiofónica, entre outras cousas, claro. 

Logo de coñecer algo da súa biografía e o seu compromiso e valores, propúxonos transformarnos en periodistas de radio, crear unha noticia e gravala. Así podiamos experimentar aquilo ao que Begoña adicou parte da súa vida profesional e, de paso, coñecíamos a radio da escola. A verdade é que foi unha experiencia estupenda. 

A noticia creámola entre tod@s e para narrala, como non podíamos ir toda aula, decidimos entre aquelas e aqueles que se presentaron voluntarios. Iso si, a coñecer a radio fomos unhas xornadas previas xuntos. 

No momento da gravación acompañounos alumnado de 6º, que viña aprender en directo como é iso de gravar.

Grazas a Mik pola proposta e, sobre todo, a mestra Ana pola súa axuda. 

Traballando xuntas chegamos mais lonxe.

 

Primeiros auxilios

Tivemos a sorte de poder contar con persoal especializado que nos explicou como reaccionar e que facer ante unha situación de emerxencia.

A que número temos que chamar, como facer se alguén perde o coñecemento, cal é a posición de seguridade e ata practicamos a chamada RCP.

Como a práctica é o fundamental, practicamos con nós mesmos e tamén cun adulto. De feito, para estar ben preparad@s escolleron para nós o adulto mais grande que había 😂 

Empregamos os nosos bonecos e tamén uns que eles trouxeron, onde a cousa xa se complicaba algo.

Moitas grazas á ANPA por esta actividade e tamén a estes profesionais que empregaron parte do seu tempo en ensinarnos a reaccionar nestas situacións. 

 

 

Día do libro

Como remate de toda a proposta para o Día do Libro estaba escribir unha carta a un compañeiro ou compañeira da escola e deixarlla no buzón da súa aula. Pois esta proposta trouxonos tamén uns buzóns estupendos. 

E como se de maxia se tratase, foi enviar nós as nosas cartas e aparecer as nosas no noso buzón. 

É certo que non nolo puxeron moi fácil para introducir as cartas no buzón, pero sempre se atopa unha solución. 

Moitas grazas compis por esas cartas que nos escribístedes con tanto cariño. 

 

Maios

As nosas tradicións son as que conforman a nosa identidade, e cando coñecemos e valoramos o noso podemos respectar e valorar o alleo. Por iso e por outras cousas valoramos a nosa participación nesta celebración. Experimentamos novidades, aprendemos cousas, rimos, desfrutamos...

Damos as grazas a todas e todos por participar, a vós familias pola vosa imprescindible colaboración e tamén a alguén que sempre se presta a axudarnos. A que con amor e vocación guía as nosas mans na confección do maio.

Como parte das tradicións de maio, tamén colgamos as xestas en diferentes partes da escola. Esas que nos han a protexer. 

 

Autor. Iago López

Xa hai unhas semanas que tivemos o pracer de poder contar coa visita do escritor Iago López. Foi unha delicia escoitar o conto da súa voz e poder formar parte, como personaxes, desta historia sobre unha pequena osa que quería xogar ao fútbol. E por que non? Somos únicos e cada unha e un de nós posúe diferentes habilidades pero todos temos dereito a experimentar o pracer de practicar aquilo que nos gusta. 

Moitas grazas Iago pola túa visita e por agasallarnos cun conto contado, e recreado. 

 

Primavera

Cambiamos de estación e xa hai algún tempo que as cousas veñen mudando ao noso arredor. As árbores teñen follas e flores, nas que vemos alimentarse ás abellas; as bolboretas veñen visitarnos menstres xogamos ou estamos de picnic, xa recollemos floriñas que nacen entre a herba...

Pois tendo todo isto nos nosos sentidos comezamos a falar do que sucede nesta estación e decidimos que cores a caracterizan. Cada unha e cada un vai facendo as súas achegas e rematamos vendo cadros de campos e bosques primaverais. Todo fonte de inspiración para logo plasmar estas cores nun mural que colocar a carón dos das outras dúas estacións.

Empregamos de novo pigmentos naturais e desta vez imos a darnos o gusto de empregar as nosas mans para cubrir todo o papel. Logo, xa seco, facemos uso de boliñas de algodón cheas de cores. Que gracia e que pracer deixalas caer e escoitar ese chof contra o papel. Antes era verde e agora está cheo de flores de cores.

 

Madriñas e padriños lectores

Pois aquí nos tedes coas nosas madriñas e os nosos padriños. Enfrontándonos a novas situacións e nalgúns casos a novos retos, e con iso aumentando os nosos recursos e estratexias.

Tocaba deixarse guiar e acompañar, confiar noutro semellante ao que non coñecemos tanto. Escoitar un conto dun lector quizais non tan experto pero que pon todo da súa parte e que o fai cos maiores dos cariños e con gran ilusión. 

Foi unha experiencia estupenda que o tempo nos deixou desfrutar ao aire libre. Foi poñer un pé no interior e as nubes, que parecían querer escoitar os contos, comezaron a descargar. Quizáis elas tamén querían contar as súas historias.

Moitas grazas aos padriños e madriñas e a aquelas que fixeron esta proposta.