Contan as voces sabias que todas e todos temos un ser máxico, un ser de luz, ao que non vemos, que nos coida e protexe. Para facelo mais tanxible, creamos unhas botelliñas con cousas brillantes, e pedímoslle ao ser de luz que nos deixase nelas algo de maxia reconfortadora. Así podemos acudir á botella e conectar con el sempre que o precisemos.
Que non se nos esqueza crer na maxia. Todo é posible, ou case.
A maxia é unha ciencia que aínda
non logramos comprender
Arthur C. Clarke
Como xa é tradición no noso cole, celebramos Os Maios. Unha festa arraigada en Galicia coa que dar a benvida á primavera e despedir o inverno.
Elaboramos o noso maio coa colaboración de todo o alumnado e das familias, que nos proporcionades o material para poder levalo a cabo. E preparamos as nosas coplas; este ano tamén participamos o alumnado de Infantil. Coplas nas que contar o acontecido e tirar das orellas, dende o respecto, a algúns.
Foi fantástico poder compartir esta festa de maneira conxunta familias, alumnado e profesorado, axudando a coñecer e valorar os nosos costumes e sinais de identidade.
Moitas grazas a todas e todos, a Toniño pola súa labor e a esas mans que sempre nos acompañan para esta festa, regrasando cada curso a ese lugar no que tantos anos ensinou.
As axudantes de biblioteca de 6º, prepararon para nós un obradoiro que tiña como punto central o libro Simón corazón de camaleón.
O obradoiro levouse a cabo en varias xornadas. Na primeira contáronnos a historia con apoio visual que elas mesmas elaboraron e nos explicaron o que íamos a facer nos demais encontros: pintar un círculo, picar o camaleón e facer a montaxe.
Foi unha experiencia fantástica. Grazas pola vosa iniciativa e organización de cada unha das sesións, inclusive dos tempos de espera. Grazas tamén a todos os adultos que fomentades e permitides que estas iniciativas teñan lugar. Estes, mais os previos, son momentos de grande aprendizaxe. Non pode haber aprendizaxe mais significativa, mais ampla e enriquecedora. Outro momento de ser escola e de crecemento persoal.
O noso día a día está organizado, pero nel tamén teñen oco a improvisación e as sorpresas, porque na nosa escola pode suceder algo imprevisto en calquera momento. Como na vida mesma, de súpeto sucede algo que un non pensaba. Nesta ocasión a sorpresa veu da man de Toniño e o alumnado de 5º, que apareceron pola porta dispostos a amosarnos o que saben facer coa frauta. Moitas grazas pola vosa visita, agardamos regresedes pronto cun novo repertorio.
Quen dixo que era necesario un día determinado ou un escenario para facer unha actuación. Estes momentos son os que nos fan escola.
Hai tempo que vimos construindo números coas Taboas de Seguin e as perlas. Como sabedes, traballamos en gran grupo, de xeito individual empregando o autorexistro... Pois decidimos deixar constancia de todo este proceso de traballo en formato papel. Para iso eleximos un número e logo collemos o que precisamos para construilos coas perlas. Cantas decenas e unidades precisdo? Si, estes termos tamén chegaron no seu momento.
Sabedes que na nosa aula o material e as propostas van e veñen en función dos nosos intereses e necesidades.
Dun tempo a esta parte andamos a enredar cuns xogos novos que nos teñen cautivado@s.
Chegou o día da visita de Ledicia Costas, a escrituora de Sete dentes de león, ese libro que tanto nos gustou e co que tanto traballamos. Tivemos o pracer de que ela mesma nos contara a historia, de que respondese as nosas preguntas e compartise parte do seu tempo connosco. Nós aproveitamos para amosarlle todas as propostas que xurdiron do seu libro e coas que xogamos, creamos...
Moitas grazas Ledicia pola túa visita, polo teu cariño e a túa dozura.
