A nosa primeira celebración, logo da Reapertura da Biblioteca, chegou uns días despois. E, como non podía ser doutro xeito, houbo de novo disfraces.
Entre disfraces e visita a casa dunha meiga do bosque amiga de Rocío mais o túnel do terror e cociñar un biscoito, pasounos a semana nun pis pas. Tan atarefadas e atarefados andivemos que non sentimos nin o medo, se é que era iso o que tiñamos que sentir. Bueno, houbo a quen non lle caeu moi simpática a meiga, pero había tanto que ver e descubrir nese lugar no que todo brillaba...
Grazas ás meigas que o fixeron posible e, como non podía ser doutro xeito, a vós familias, por axudar a que estes momentos sexan especiais.
Pois alá fomos a ese espazo especial no que habitaba a meiga. A invitación fíxonola Mik dende a biblioteca. Preparounos grupos mesturando a todo o alumnado de Infantil e o de 1º de Primaria, así que foi un momento no que compartir cun montón de compañeiros do cole.
A meiga propúxonos unha chea de retos: recuperar a súa vasoira, crear caras en cabazas segundo un modelo, atopar bichos e ata descifrar e elaborar unha pócema que as mais valentes e os mais valentes puideron probar.
Canto nos agasalla cociñar!! Para nós foi a primeira experiencia compartida arredor dos ingredientes; e de seguro que repetiremos pronto.
Cociñar permítenos observar transformacións, coñecer ingredientes, mellorar a precisión e o dominio da nosa motricidade, desfrutar, ou non, con cheiros, texturas e sabores... así como compartir experiencias e o pracer de probar, comer e que outros coman algo feito coas nosas mans, o noso coidado, a nosa atención e o noso esforzo.
