Día contra a violencia de xénero

O 25 de novembro foi o Día contra a violencia de xénero e dende o centro sumámonos a dúas propostas. Unha chegou dende a ANPA e foi o colofón final dunha serie de actividades sobre a igualdade que se levaron a cabo en diferentes cursos. Trouxeron como agasallo unha camiseta co lema A NATUREZA É DIVERSIDADE, SÉ NATURAL, buscando tamén a súa vinculación co noso proxecto sobre os seres vivos en perigo de extinción e o coidado do planeta. E con ela posta bailamos a canción La puerta violeta de Rozalén. 

A segunda proposta chegou da man de MIK. Recomendounos a lectura do libro Don caballito de mar e enviounos uns vídeos con algunha curiosidade sobre este animal tamén en perigo de extinción. Entre elas, que é o macho o encargado de xestar e traer á vida as súas crías, como sucede con outras especies mariñas. Ademais animounos á elaboración de xeito plástico dun cabaliño de mar similar ao da portada do conto por parte de todo o alumnado, así como a decoración das letras que conforman o lema das camisetas. 

Deixamos aquí algunhas fotos, aínda que o lema non estaba de todo rematado, pois lle faltaban uns detalles gramaticais por engadir.

Graciñas á ANPA pola súa proposta e por ese traballo sobre igualdade e a tod@s pola vosa participación.